Най ся голос несе
"Як собі засьпівам на высокій горі, та мій голос піде по вітцьовім дворі" – то слова знаной нам добрі сьпіванкы, котра єст головным мотивом оперы "Голос". Композиторка Дария Кузяк не лем створила першу лемківску оперу, але тіж вынесла нашу культуру до шыршой публикы. Як сама повідат, опера то не лем єй оповіст, то голос Лемків – выганых з рідной Лемковины, што долгы рокы жыли в тишы, але тіж молодого поколіня, котре гнеска хоче розвияти нашу культуру і голосно бесідувати о своіх коренях. Тот голос понюс ся до сьвіта! Лемківска опера то не лем музичне діло, сценічне видовиско, сплетены зо собом традицийны танці і сьпівы зо сучасныма. Сеса пребогата артистична верства то так направду сам вершок горы. Шак опера то дуже веце – спільна праця і інтеґрация здібных артистів, участ розмаітых народности і вражливости при лемківскім проєкті, барз міцна промоция в публичных медиях, отверте бесідуваня о нашым болячым минулым і ясным будучым, до котрого хцеме горді іти. То вздвиг Лемків, котры цілыма родинами приходили на выступы і выходили з сылзами в очах. За нами остатнє вказаня оперы в Народовім Форум Музикы во Вроцлаві, де на публиці зобрало ся праві же 1400 люди. Просиме на проґрам в Радіо Лемко, де почуєте веце о опері, тай переносиме ся до Вроцлавя, штобы іщы раз пережыти тоты емоциі. Оддаєме голос людям з публикы, котры поділили ся з нами своіма передуманями перед і по выступі. Наталия Пеляк-Яща, ведуча групы промоциі, оповідат, як обдумане было промуваня оперы, Лемків і Лемковины. Щыро просиме Вас на проґрам, пережыйме тото іщы раз!
- Пуст
- Шмар на листу
- Заприй