Листы Лемків на Лемківскій Ватрі
В днях 31 липця - 2 серпня 2026 рока была 46. едиция Лемківской Ватры на Чужыні. До Михалова, невелькой місцевости на Нижнім Шлеску, недалеко Любіна, приіхали Лемкы тай любителі лемківской культуры з цілой Польщы і заграниці. Тогорічна Ватра, обік сценічных выступів, пропонувала тіж вельо атракций для діти і дорослых – варштаты, новы тематичны зоны і прелекциі посвячены істориі і культурі Лемків. Єдным з запрошеных бесідників были Юрій Стариньскій – історик, соспільно-культурний діяч, основатель Лемківского Ансамблю Пісні і Танця “Кычера”, орґанізатор Медженародного Фолькльорного Фестівалю “Сьвіт під Кычером”, тай автор вельох публикаций. В часі стрічы звязаной з тритомовым выданьом “Преселили нас мусово. Листы Лемків з років 1947-1948” Юрій Стариньскій оповіли о праці над тым вынятковым цикльом, котрий є на чудо цінным сьвідоцтвом трагічной долі лемківской соспільности в часі акциі “Вісла”. Публикация вказує діі з погляду самых выселеных. Зобраны в томах листы дают пізріти на выселіня очами люди, котры го зазнали – на іх штоденніст, емоциі, тугу за рідном земьлом тай пробы однайти ся в новій реальности. Приватны листы творят жывий образ істориі, котрий выходит поза офіцийны документы і опрацуваня. Стрічу, што была нагодом познати тло вказаня ся публикаций і побесідивати о памяти, істориі, спадковині Лемків, вюл Іван Рубич з Лосі к. Ґорлиц.
- Пуст
- Шмар на листу
- Заприй